Thoughts of A Female

تعمدت أن يكون هذا الموضوع بدون عنوان. هل احنا بحاجة لعناوين فعلا؟ هل العناوين تمثلنا و لا احنا الي انمثل العناوين! الواحد منا يحتاج انه يكون نفسه بدون أي مكياج و لا عطور تغطي شخصيتنا الفعلية! لأنه أنا برأيي أنه المكياج و العطور عبارة عن عناوين و في معظم الأحيان العناوين تكون عبارة عن لمحة غامضة ما لها أي صلة بشخصيتنا الحقيقية!!!
نلاحظ المجلات و الجرايد تحط عناوين اتخلي القارئ غصب عنه يقرا الموضوع و بالأخير يتحسف إنه قرا أساسا !!!فعشان جذي ما راح احط عناوين من اليوم و رايح و بخليها مفتوحة جذي بدون أي رتوش أو مكياج أو عطور اتخليكم تقرون و بس !!

على العموم، الهدف الرئيسي من وراء كتابتي لهذا البوست شي يحرقني صار له جم شهر و أشعل الي فيني شغلة صارت من جم يوم!! مشكلة لماالغبي يمسك منصب! و الغبي أقصد فيه الجاهل الي ما يعرف يسوي أي شي عشان بس ما أظلم كل الأغبية.

عندنا في الدوام، ناس ماسكين مناصب حساسة بشكل مو طبيعي و صدقوني ما يعرفون يشكون خيط بابرة الا لما يرجعون حق الي تحتهم، يعني ثولان و هذي قمة الغباء!! يتفلسفون بشكل مو طبيعي و على بالهم أن اهم و بس و ما حد أحسن منهم و اهم أصلا مو عارفين حق نفسهم على بالهم أنه أسلوبهم شطارة و أن اهم مدراء و ما كو أحد أحسن منهم ما يدرون أنه في رب فوقهم يحاسبهم على كل شي!! "كلكم و لي و كلكم مسئول عن رعيته"
مشكلتي أنا معاهم أنهم عارفين ما أواطنهم بعيشة الله و لا أشتهي أشوف رقعة ويوهم الودرة!! بس ما يقدرون يقولون لي شي عشان أنا معينة بواسطة قوية لا اهم و لا الي أكبر منهم يقدر يشلعني من مكاني!!! أنا ما أقول جذي شحاطة و لا اني شايفة نفسي، بالعكس أنا الي أبي أبينه بكلامي أنه على مناصبهم الي ماسكينها المفروض انهم يسوون الي يبونه بس مو قادرين و هذا أكبر دليل على ضعف شخصيتهم!!!!!!!!!!!! انه أنا الموظفة الصغيرة نائب المدير العام مو قادر يسوس لي شي!!!! شي يضحك و الله!!
المهم، فعشان الحبايب يطفشون من المكان يتجاهلوني بالشغل فيتعمدون أنهم يعطون الشغل حق البنات الي توهم متعينيين و أما امخلني على كيفي !!! أول شي كنت أنا حيل اتضايق و اتصك فيني الدنيا بس الحين لأ بديت اتعود على الي أنا في و صار عندي عادي .. و صار وجودهم و عدم وجودهم عادي مالهم أي أهمية و إذا بغيت أسوي شي أسويه بدون ما أرد لهم لأنهم أساسا مو كفو!يعني صرت أنا مديرة نفسي و هذا أحلى شي

"صج لا قالوا الطول طول نخلة و العقل عقل صخلة"

و بقية التحلطم تأتي :)